IPL गुजरात टायटन्सची ‘लॅव्हेंडर’ जर्सी आणि कर्करोग
गुजरातच्या नरेंद्र मोदी स्टेडियमवर १५ मे रोजी गुजरात टायटन्स विरुद्ध सनरायझर्स हैदराबाद असा आयपीएलचा सामना झाला. या सामन्यादरम्यान गुजरात टायटन्स संघ ‘लॅव्हेंडर’ रंगाच्या जर्सीत झळकाल्याचे सर्वांनी पाहिले. त्यानंतर अनेक माध्यमातून त्यांनी परिधान केलेल्या ‘लॅव्हेंडर’ जर्सीवर चर्चा झाली. संघाचा कर्णधार हार्दिक पंड्या याने त्यांनी परिधान केलेल्या ‘लॅव्हेंडर जर्सी’ मागील उद्देश जाहीर केला होता. भारतात तसेच जगात कर्करोगासारख्या (कॅन्सर) विकाराने बळी जाणाऱ्यांची संख्या वेगात वाढते आहे. याच रोगासंबंधी जनजागृती करण्यासाठी आणि कर्करोगा विरुद्धच्या लढाईला पाठिंबा दर्शविण्यासाठी लॅव्हेंडर रंगाचा प्रतिकात्मक वापर करण्यात आलेला आहे. तसेच कर्करोगपीडित व त्यांच्या कुटुंबियांसोबत सहवेदना दर्शविण्यासाठी आयपीएल सामन्यांदरम्यान गुजरात टायटन्सकडून या रंगाची जर्सी परिधान करण्यात आली होती. लॅव्हेंडर हा रंग सर्व प्रकार कर्करोगाच्या जनजागृतीचे प्रतिनिधित्त्व करतो. एकूण ४३ रंग वेगवेगळ्या प्रकारच्या कॅन्सरच्या जनजागृती मोहिमेचे प्रतिनिधित्त्व करतात. किडनीसाठी लाल, स्तनांच्या कर्करोगासाठी गुलाबी तर त्वचेच्या कर्करोगासाठी काळा अशा वेगवेगळ्या रंगांचा वापर करण्यात येतो.
